LARAWAN NG BUHAY

Ang larawan nitong ating buhay ay maganda

Katulad ng liwanag na ating nakikita

Ngunit kung may dilim ay itawag mo sa Kanya

Ito’y kanyang papalitan ng kaaya-aya

——

Kaya huwag kang padadala sa iyong lungkot

Sa mga bagay na sa iyo’y makakabagot

Nararapat na iwaksi ang mga himutok

Pagkat madadagdagan lang ang iyong kulubot

—–

Dumarating na pagsubok ay ‘yong paglabanan

Pasasaan ba’t magagawanrin ng paraan

Pagka minsan ay kusang dumarating na lamang

Kalutasan sa problema’y ‘di namamalayan

—–

Masamang pangyayari dapat ng kalimutan

Ang hinaharap ang dapat na mapaghandaan

Upang maging maayos ang inyong pagsasama

Sa piling ng mga anak at ng sinisinta

—–

Hindi lamang naman ikaw ang nagkakaganyan

Di mo rin kasalanan ang naging kamalian

Kung kaya maging payapa ang ‘yong isipan

Kaysa maglupagi at umiyak ka na lamang

—–

Lagi kang umasa sa ating Poong May Kapal

At pagtiwalaan mo ang Kanyang pagmamahal

Sadyang makikita mo’t iyong mararamdaman

Ang payapa’t katiwasayan ng ‘yong isipan

—–

Walang uuna pa sa ating nilalapitan

Sa bawat oras ‘Sya ang ating tinatawagan

Sapagkat ‘Sya lang ang ating tanging kalutasan

Sa ‘ting mga suliraning pinagdadaanan

—–

Nararapat lang tayong lahat ay maging handa

Sa ating pagharap sa biro nitong tadhana

Ano mang unos ang dumating sa ating buhay

Itawag sa Poon, tayo’y kanyang tutulungan

—–

Advertisements

(Tula) BUHAY NAKAKAUMAY

Ano nga ba itong ating buhay

Parang kalamay, nakakaumay

Laging daing ang hirap ng buhay

Problema pa’y laging sabay sabay

———–

Ginawa ng lahat na paraan

Lahat ng bagay ay sinubukan

Hinanap sagot sa katanungan

Pawang kay ilap na matagpuan

———-

Mga luha’y ibig ng bumigay

Sa mga problemang walang humpay

Pagsubok na wala sa pag lubay

Sunod sunod dumaraang lumbay

———-

Talaga bang ganito kabigat

Minsa’y ‘di na makayang mabuhat

Ngalay at laylay na ‘tong balikat

Nanaisin na lang pumalakat

———

Utak nais ng maghuramintado

Dahil sa isiping nakakahilo

At mga tanong na nakakalito

Buhay nga ba sa mundo’y ganito

———-

Magrelaks lang tayo kaibigan

Lahat ng ito’y may kalutasan

Ipagpatuloy ang pagdadasal

Wag pangunahan ng pag atungal

———-

Kaya ang pag nguyngoy ay tigilan

Buhay sa mundo’y talagang ganyan

Ito’y may simula’t may hangganan

Tibayan ang loob at labanan

———-

Sa panalangin, laging sambitin

Na parati nawang pagpalain

Pasaning mabigat pagaanin

Mga suliranin ay akuin

———-

Sa biyaya, magpasalamat ka

Ang nagdarahop, bahaginan pa

Sa dulo ginhawa’y makakamit

Kaya tiis sa mga pasakit

%d bloggers like this: