NANG DAHIL SA ‘YO

Nanunukso ka na naman sa akin dyan

Parang ‘di makali na ako’y titigan

Mga sulyap, akala mo’y ‘di ko alam

May pa-irap irap ka pang nalalaman

—–

Ninanakaw mo, tamis ng aking ngiti

Na sa ‘yong pwesto mata ko’y nagagawi

Pano’y pang gayuma mo’y ganun katindi

Nang ako’y lumapit, wag mag atubili

—–

Ayaw kong patukso sa pang-aakit mo

Mga kilos at asta mo’y di ko gusto

Sarili kong plano ay ‘yong ginugulo

Pati takbo ng utak ko’y nababago

—–

Ngunit bakit nga ‘di kita maiwasan

Ano bang uring gayuma meron ka dyan

Kahit unti-unti  kang nilulubayan

Paglapit sa ‘yo, di ko kayang pigilan?

—–

Inaakit mo pa ang aking panlasa

Pakiramdam ko’y unti-unting nag-iba

Naantig na rin pati puso ko’t diwa

At ngayon nga ako’y iyong nahalina

—–

Sabi ko pa naman na ikaw ay iwasan

Ngunit pasaway at ‘di mapagsabihan

Ang “cholesterol at uric” nagtaasan

Kawawang katawan gamut ang kelangan

—–

Lechon sa handaan ayaw ko na sa’yo

Wag akong titigan, wag kang manunukso

Pagkat sakit sa puso, mapapala ko

Hayaan mo na lang kung sinong may gusto

 

KATAKAWAN

Sa hirap ng tulang aking ginagawa

Sa tagal pag isipan, tyan ko’y nagwala

Agad naisip puntahan ang kusina

Namungkal para sa gutom na sikmura

 —–

Ako’y napapikit at may  naalala

Si pinsan Tony pala’y may dala-dala

Isang kahong biko, na napakasarap

Paborito pagkain, sa tuwina’y hanap

—–

Pag silip ref ay ‘di magkandatuto

Sa ‘king nakita ako’y biglang nalito

Pagkat may tira pang masarap na biko

Ito’y bigay rin ng pamangkin kong gwapo

—–

Paboritong binibili sa probinsya

Tawag nila dito’y sinukmani baga

Masarap kanin kape ang kapareha

Kahit almusal, pati na sa meryenda

—–

May nakita pa akong tapang espesyal

Binili ko iyon sa bayan ng Taal

Tapang masarap para sa ‘ming almusal

Lalantakan, kahit oras ng mirindal

—–

Ako talaga’y nakaramdam ng gutom

At natalo ko pa, ang hilong talilong

Sa dami ng nakain, t’yan ko’y umusbong

Di alintana kung tumaas ang presyon

—–

Dahil sa sandamukal, na nilantakan

Pusod ko’y umusli at ‘di na nakagalaw

Ito ang napala sa ‘king katakawan

Sa pag gawa ng tula, ‘di nakahataw

(tula) ALMUSAL NAMIN

Bumangon ako sa kamang inaalimpungatan

Ako pala ngayon ang magluluto ng agahan

Kay haba ng magdamag  hindi ko napag-isipan

Kung anong aking ihahain sa hapag kainan

—————

Mag-isa lang pala ako’t walang dapat asahan

Pagkat kasama ko’y sumama na sa kasintahan

Kayat pupungas pungas na nagtungo sa lutuan

Hinagilap ang kawali’t pinaningas ang kalan

—————–

Sa sinangag kong iluluto, walang sasarap pa

Kayat ako’y nag pitpit ng bawang, agad ginisa

Inihulog ang kaning lamig, kagabi’y natira

Hinaluan ko rin ng magic sarap na panlasa

—————

May mixed vegetables pa akong naisip na isama

Nag prito ako ng itlog at espesyal na tapa

May mainit na 3 in one coffee na kapareha

Kayat ang sinangag ko’y swak sa kanilang panlasa

—————

Agad kong ginising ang mga anak sa higaan

Upang almusal sa hapag kanila ng matikman

Ngunit napansin kong tila kay daling nagtayuan

Almusal kong inihanda ‘di pala nagustuhan

(Tula) PABORITO KONG JELLY ACE

Isa sa aking paboritong pagkain

Masarap hawakan malambot pisilin

Matamis pero mayr’on ding konting asim

Pang himagas matapos akong kumain

 

Paglapat sa dila’y masarap namnamin

At sa lalamuna’y mabilis hagurin

Dahil sa lambot ay madaling lunukin

Kahit tatlong piraso’y sabay sabayin

 

Ito ay mayroong iba’t ibang kulay

Pag pinagsama sama’y puno ng buhay

Pati ang lasa nito’y walang kapantay

Pag iyong natikma’y ‘di mo tatantanan

 

Sa unang tikim malalasaha’y asim

Mapapapikit paligid mo’y didilim

Pagkat lasa nito’y ang sarap lasapin

Waring kinakai’y masarap na icecream

 

Maasim ngunit sa dila ay may tamis

Sa unang kagat paglunok ay kay bilis

Di pa naglalao’y agad mong mamimis

Parang mahal mo na kaylan lang umalis

 

Jelly Ace bakit ba ikaw ay kay sarap

Ang katulad mo’y isang mithing pangarap

Na kay saya kapag ito’y natutupad

Ang pakiramdam ko’y halos nasa ulap

 

At dahil nasa ‘yo ang lasang hanap ko

Ang  panghimagas na aking paborito

Sanay ‘di maglaho at laging narito

Kung wala ka’y guguho ang aking mundo

(Tula) ANG SARAP NG ULAM KO

Iniisip ko ngayo’y anong aking iuulam

Sawa na ang dila ko sa mga luto ni manang

Parati na lamang isda o baboy na sinigang

Putaheng naiiba naman ang aking titikman

 

Ulam namin sa probinsya’y aking naalala

Nilagang talong, talbos ng kamote at okra

Tiyak na masarap kaya dapat kong iluto na

Para sa dilang ang hanap ulam na naiiba

 

Sawsawang toyo’t kalamansi’y inihanda ko na

Pati ang bagoong na may kasama pang mangga

Kapag ganito ang ulam pagkain ko’y magana

Sinaing ay damihan siguradong mauubusan ka

 

Bigla akong nanabik sa ganitong mga pagkain

Naisip ko tuloy ano’t mag prito pa ng daing

Mayron pala si manang sili at sukang maasim

Dito naman isasawsaw ang prito kong uulamin

 

Isa pang masarap ang itlog na pula o maalat

Kamatis naman ang isasama yan ang katapat

Kapag inulam pa ito tiyan ko’y mabubundat

Pano pa ang paglakad siguradong nakahiyad

 

Tunay na napakasarap ng ganitong pagkain

Lalo’t malambot lambot pa yaring aking sinaing

Dito’y bagay na bagay naman ulam ay bilutin

At gagamitin ko’y kamay sa pagsubo ng kanin

 

Gusto ‘nyo rin ba ng ganitong klase ng pagkain

Halina’t sumabay at kayo’y aking bubusugin

Pagkat sobra sobra na itong aking uulamin

Sa maliit kong t’yan kung ito’y aking sosoluhin 

 

Sarap ng ulam ko noh? 

%d bloggers like this: