ANG MATANDANG LALAKI AT ANG DALAWANG ASO SA KARITON

Pangalawang beses ko ng nakita sa aking pagmamaneho sa lugar na iyon ang isang matanda na may tulak na kariton na sa tingin ko ang laman ay mga basura, na siguro ay mapapakinabangan pa ng matanda. May takip na maruming sako ang kariton na maaring pauwi na siya sa lugar kung saan ‘sya ay naninirahan. Mahaba at maputi ang kanyang buhok na waring hindi man lang nasusuklay. May balbas at hindi malinis ang katawan pati ang kanyang damit na mahaba ang manggas ay punit rin.

Sa pangalawang beses kong siya ay nakita binagalan ko ang aking pagmamaneho at pinagmasdan ko silang mabuti. Namamangha ako sa matandang iyon at humahanga na rin. Alam nyo ba kung bakit? dahil may kasama ‘syang dalawang aso isang kulay brown na may batik na puti at isang puti na may batik na itim.  Bigla kong naalala ang aking asong si Cysai at nakaramdam ako ng awa sa dalawa, mapagmahal rin kasi ako sa aso, napaka swerte nitong aso ko. Malinis ang tinatapakan. malinis ang kinakain, may malinis na tirahan hindi napapagod at hindi nahihirapan. Wala ‘syang ginagawa kundi kumain, matulog lang sa bahay at kumahol pag minsan.

Ang dalawang asong nakita ko na kasama ng matandang lalaki ay nakatali sa dalawang sulok sa may bandang unahan ng kariton, sa tingin ko ay parang katulong sa paghila nito. Hingal na hingal ang dalawang aso. Nakalawit ang dila na waring pagod sa paglalakad at siguro ay nakakaramdam na rin ng gutom. Nakaramdam talaga ako ng awa sa kanila kasi naman siguradong lagi silang kasama ng matandang iyon kung saan saan sa gitna ng init ng araw at maaring kulang sa pagkain.  Dahil sa sila’y aso hindi sila pwedeng mag reklamo wala silang magagawa kundi sumunod sa kanilang amo. (kung ayaw naman nila sumama p’wede rin nila kagatin ang tali  para makawala at tumakbo)

Maaring ang matandang aking nakita ay marunong magmahal at mabait rin mag alaga ng aso. Ilan na kayang aso ang nakasama ng matandang iyon? Naisip ko tuloy na marahil ay minabuti nyang makipagkaibigan na lang sa mga aso. Siguro dahil ang aso ay hindi marunong manghusga hindi tulad ng tao, na sa unang tingin pa lang sa’yo ay mayroon ng pang huhusga na nasa kanyang isipan. Mas nakakaramdam siguro siya ng saya sa dalawang aso ‘nyang alaga na itinuturing ‘nyang matalik na mga kaibigan, mas nakakaunawa, nakakatulong at nagbibigay ng saya sa araw-araw nilang pagsasama. Mabuti pa ang aso bigyan mo lang ng buto ay nakukuntento na. Hindi tulad ng tao naibigay mo na ang lahat pero sa bandang huli ikaw pa ang sasakmalin. Ang aso aawayin ka lang kapag sinaktan mo, maliban na lang kung ang isang aso ay nauulol.  Ang tao, kahit wala kang ginagawang masama aawayin ka pa rin.

Tuloy parang gusto ko ring magkaroon ng maraming kaibigang aso. Hehehe! pero hindi na kailangan mayroon ako nito. Para sa akin ang matandang iyon ay hindi lang isang pagala galang tao na palaging may kasamang aso, kundi sila ay naglalarawan ng isang magandang samahan. Samahan ng tunay na magkakaibigan. Wala na sigurong tatamis pa sa samahan ng magkaibigang laging magkasama saan mang lakaran, karamay sa ano mang takbo at yugto ng buhay. Wala tayong magagawa kung sa aso niya ito natagpuan. Sana lang ay matagpuan din natin sa mga itinuturing nating mga kaibigan ang magandang kalidad ng isang tunay na kaibigan ano man ang estado natin sa buhay…..

Advertisements

(Tula) ANG AKING SASAKYAN

 

Kailangan kong magtungo mamaya sa pagawaan

Pagkat kay rami na ng sira nitong aking sasakyan

Baka sa edsa ako’y itirik sa kalagitnaan

At pagkatapos sa kalsada ako’y mapag iwanan

Nasabitan pa naman ang aking bumper sa unahan

Nang isang van doon sa edsa corner ng kalayaan

Nagmamadali at nag over take sa aking sasakyan

Kaya sa pagliko’y kinapos, bumper ko’y tinamaan

May kaiba rin akong napansin sa gasolinador ko

Ayaw kasi umusad kahit tapakan ko ng todo

At marahil nadamay na rin pati ang aking preno

Napaka hirap ihinto at tuloy tuloy ang takbo

Mas lalong kailangan makina nito ay matingnan

Ang tumatagas nitong langis dapat ng mapigilan

Panay ang pagtulo baka ito ngayo’y matuyuan

Gasolina’y apektado ngayon ay napakamahal

Ganun din ang motor ng erkon dapat na ring palitan

Pagkat ang lamig ay hindi ko na rin nararamdaman

Buga ng hangin ay mainit na sa’king pakiramdam

Sasapit ang tag-araw tiyak ako’y pagpapawisan 

Ang maingay na wiper ay ipa-paayos ko na rin

Sapagkat mahirap kapag umuulan at madilim

Baka madisgrasya kung malabo ang aking salamin

Babagal ang pagtakbo direksyo’y mahirap basahin

Palyado at mahina na ang pag andar ng makina

Masama ang tunog at pakiramdam ko’y bibigay na

Kailangan bigyan ng pansin agad maipagawa

Upang pagbyahe kong muli ay magdulot ng ginhawa 

%d bloggers like this: